Зера Меджитова: Гонълюмлинъ орьнеклери

Зера Меджитова киби инсанларгъа бир къач унернинъ устасы деп айталар: о балалар тербиеджиси олып чалыша, дерс бере ве онынъ аджайып авеслиги (хобби) бар – о джам устюнде ресимлер (витражная роспись по стеклу) япмагъа севе.
Осеяткъан яш несильнен чалышкъан джанкуерлеримиз акъкъында икяелеримизнинъ бугуньки къараманы – Алуштадаки 10 санлы балалар багъчасынынъ юксек категориялы тербиеджиси Зера Меджитовадыр. О, оджалар сюлялесининъ девамджысыдыр. Озюнинъ эсас ишинден гъайры тувгъан тилимизни балачыкъларгъа ашламагъа ынтыла. Алуштада миллий тилимизнинъ огренильмеси ичюн тешкилятландырылгъан ильк ве екяне «Кунешчик» тёгерегининъ ёлбашчысыдыр.
Зера Меджитова озь сюлялеси хусусында сёйлер экен: "Мен озюмни оджалар сюлялесининъ векили, деп саям. Чюнки къартбабам - Расим оджа Абдуллаев дженктен эвель Керчь тарафнынъ белли оджаларындан бири олгъан. О, Сараймен коюнде оджалыкъ эткен. Къартбабамнынъ зенааты - оджалыкъны Озьбекистанда девам эткен эвлятлары - Бесим дайым математикадан, Къасиде тизем физика фенлеринден мектепте дерс бердилер. Алиде тизем исе башлангъыч сыныфлар оджасы олып чалышты" - дей.
Тербиеджи олмакъ арзусы Зера ханымнынъ эсас макъсадына чевирилип, о, зарур тасиль алмакъ ичюн Запорожье педагогика окъув юртуна кирди. 1991 сенеси бу окъув юртуны битирген сонъ Бердянск педагогика институтына окъумагъа кирди ве 1994 сенеси "Мектеп чагъынадже балаларнынъ педагогика все психологиясы" дипломыны алмакъ наиль олды. 1998 сенеси Икмет Меджитовнен аиле къурды. «Алушта шеэринде яшап, эки огълум Эмир ве Замир Дубна университетинде али тасиль алдылар, - икяе эте Зера ханым. - 20 йылдан берли Алушта бала багъчаларында тербиеджи олып чалышам. Эр бир кунюм балаларнынъ козьчиклеринде парылдагъан къуванч тебессюмлернен башлана. 2015 сенесинден башлап Алушта шеэриндеки 10-нджы балалар багъчасында чалышмакътам. Шу йылы балалар багъчасында манъа тёгерек ишини алып бармакъ имкяны берильди. Къырымтатар тилини огренмек ичюн иляве шекилинде тайин этильген тёгерек ачтым. Коктен ерге сачылгъан кунеш нурлары эр шейге гъыда берегини киби, тёгеректе ана тили огренген балаларгъа илим бериле. Шу себептен тёгерекнинъ адыны "Кунешчик" деп къойдым. Иште, о вакъытан берли тербиеджи олып ве тёгерек ишини алып бармакътам. Иштен гъайры бир авеслигим бар. 2018 сенеси мектеп чагъынадже тасиль хадимлерининъ Бутюнкъырым форумында иштирак этип, къырымтатар фесини яраштырув боюнджа усталыкъ дерсини (мастер-класс) косьтердым. 6 йыл эвель исе витраж джам устюнде къырымтатар орьнеклеринен боялав боюнджа усталыкъ дерсини кечердим. Къырымтатар орьнеклери эр бир элементи озь манасы ташымакъта. Ватан севгиси, аман - эсенлик, къорантада боллукъ - берекетлик, ана-бабаларгъа урмет косьтермек, къыз-огъланларгъа сагълыкъ-селяметлик тилегидир. Алуштанынъ гузель манзалары манъа ильхам бере. Ресим япкъанда рухий уйгъунлыкъкъа иришем. Япкъан ресимлеримни догъмушларыма, танышларыма багъышлайим. Ватанымда яшап, чалышып, озюмни бахтлы адам дуям».
/"Арзы" меджмумыздан алынды /