Акъмесджитте алимлер, оджалар миллий фольклор, медениетинен багълы меселелерини музакере эттилер

Акъмесджиттеки миллий «Айше» къавеханесинде Къырымнынъ чешит регионларындан кельген алим, оджалар, медениет хадимлери топландылар. Олар къырымтатарларнынъ этник аньанелери, ана тили, медениетини сакъланып къалынмасы ве инкишаф этюв меселелери этрафында чыкъышлар яптылар, джиддий мевзуны музакере эттилер, озь фикир ве теклифлерини бильдирдилер.
Мерасимни «Арзы» меджмуасынынъ муарририети, «Алем-и нисван» Къырымтатар миллий меркези (реис Лентара Халилова) тешкилятландырдылар. Тедбир «Медениет ве тасиль хызметинде» адлы программасынынъ черчевесинде отькерильди. Мерасимге Акъмесджит, Кезлев, Къарасув, Зуя къасабасы, Алушта, Керич, Бахчасарай, Еди Къую (Ленино), Къурман Кемельчи, Биюк-Онлардан мусафирлер тешриф буюрдылар. Къайд этмели ки, муааририет ве меркез Къырым регионларында бойле тедбирлерни сыкъ-сыкъ отькере.
Тедбирнинъ башында онынъ алып бараджысы, «Арзы» меджмуасынынъ баш муаррири, Къырымда нам къазангъан журналист Лентара Халилова чыкъыш япаракъ, буларны айты: «Къырымда фольклор мевзусына багълы тедбирлер отькериле, анда чокъсу миллий оюн, йырлар янгъырай, бизим тедбиримизде исе интеллектуаль элитамыз топланды демек мумкюн, ве олар озь меракълы, файдалы чыкъышларнен, марузаларнен буны тасдикъладжакълар». Шуны де къайд этмели ки, бу муарририет ве тешкилят фольклорнен багълы Къырым регионларында чокъ тедбирлер отькере. Вернадский адына Къырым федераль университетининъ доценти, филология илимлери намзети, Къырымтатар языджылары бирлигининъ азасы Шевкет Юнусов озь чыкъышында къырымтатар эдебиятынынъ аньанелери акъкъында икяе этти. Февзи Якубов адына Къырым муэндистик ве педагогика университининъ ичтимаий-гуманитар фенлери кафедрасынынъ мудири, доцент Рефик Курсеитов этнография меселери боюнджа сёз юрьсетти, ве тарихий анъ сакъланып къалмасына багъышлангъан чыкъыш япты. Къырымтатар языджылар бирлигининъ реиси Урие Эдемова ана тили, къырымтатар эдебияты, базы классик эдиплеримизнинъ иджадынен таныш этти.
Кезлевдеки генерал Исмаил Булатов адына №18 санлы орта мектеп мудири Ребия Адживиляева, башлангъыч сыныфнынъ оджасы Рима Гафарова озь чыкъышларнынъ девамында мектепте ана тили, къырымтататар медениети инкишафына, языджыларгъа багъышлангъан мерасимлер акъкъында тарифледилер. Олар мектепте улу мутеффикир Исмаил Гаспринский, къырымтатар классиклери Эшреф Шемьи-заде, Бекир Чобан-заде ве дигер корюмли эдебий ве джемат эрбапларымыз хатырасына багъышлангъан мерасимлер отькерильгенини сёйледилер. Мудир, мектеп янъы къурулгъан бинасына кочькенини айтып, оджаларны онъда давет этти. Къайд этмели ки, Рима Гафарова бу мектепте миллий сыныфны алып баргъан биринджи оджадыр. Белли оджа-фольклорджы, языджы, «Янъы дюнья»нынъ хадими Айше Кокиева, фольклор акъкъында китап, материалларнынъ муэллифи, миллий фольклорнынъ хусусиетлери, инджеликлерине багъышлангъан чыкъыш япты. Алуштадан кельген оджа Гульнара Абдульваапова ве айни ерден олгъан тербиеджи Зера Меджитова шеэрде отькерильген медениет-тасиль тедбирлер акъкында икяе эттилер. Зуя къасабасынынъ оджасы Мунивер Лятифова озь теджрибесинен болюшты. Оджа ве уста Мумине Велиляева къасабада миллий урба лейхасынынъ омюрге кечювде айрыджа токътады.
Тербиеджилер Эмине Кумышева (Акъмесджит) ве Зера Меджитова (Алушта) миллий группаларында чалышкъан, яни озь теджрибисинен пайлаштылар. «Терджиман» интернет-тюкянынынъ мудири Мерьем Баирова, усталар Найле Велиева Акъмесджиттен, керамик устасы Зульфие Сеитвели Къарасубазардан, авескяр рессам Луиза Чантаева Къурмандан озь иджадынен таныш эттилер. Такъдим этильген ишлер миллий иджатнынъ аньанелерини гъайрыдан тиклей ве инсанларгъа яхшы кейф багъышлай. Олар чешит техника боюнджа меракълы, дюльбер ве озьгюн ишленген ве чешит жанр ве ёнелишлер боюнджа усталыкънен япылгъан. Чебер къадынлар амелий санатнынъ чешит ёнелишлери боюнджа чалышыр экенлер, эски усуллардан файдаланалар ве бойлеликнен, миллий санатны зенгинлештире ве джемааткъа такъдим этелер.
Белли оюнджы-устаз Мунир Аблаев миллий оюн тарихы акъкъында меракълы икяе этти. Онынъ реберлигиндеки «Теселли» оюн такъымынынъ талебелери, тедбирни яраштырып, мусафирлер огюнде миллий оюнлар тёшедилер.
Халкъара конкурсларнынъ лауреати Нилюфер Халилова халкъ йырларыны иджра этти.
Тедбирде, улу оджамыз И. Гаспринскийнинъ торунчеси санатчы Эдие Аблаева, генерал Исмаил Булатовнынъ торуну Ферузе Аблаева, Бахчасарайдан кельген чокъбалалы ана Сание Савина, Къырымтатар языджылар бирлигинъ азасы Медиха Мамбетова, къырымтатар тили оджалары Земфира Курбанова ве Нилуфар Шокирова, ифадели окъув ярышынынъ гъалиби Алие Рефатова, уста Эльвира Якубова Биюк-Онлардан, экимлер Эльвира Мустафаева ве Севиля Велиляева (Бахчасарай), миллий газетлерининъ хадимлери иштирак эттилер.
Бу тедбирде эр кес умумий тиль тапып, яш несильге къырымтатар этник аньанелери, ана тили, эдебият ве тарихымызгъа севги ашламакъ макъсады – биринджи ерде турмалы, деген фикирлерини сеслендирдилер. Тедбир парлакъ миллий оюнларынен екюньленди. 🌹🌹🌹🌹🌹
«Айше» къавеханесининъ мудири Хайсер Аметовгъа буюктен-буюк тешеккюрлер бильдиремиз.💕