Отар коюнде этнография музейи телебелерни меракълана

Сакъ районындаки Отар (Веселовка) Аметхан Султан адына коюнинъ мектебинде Къырымтатар этнография музейи фаалиет косьтермекте. Музейнинъ экспонатлары арасында къыйметли неснелер мевджут: ХIХ асырдаки Къуран-и Керим, бакъыр бардакъ, гугюмлер ве башкъа савутлар. Урба: ХХ асырнынъ башында олгъан къадын-къызлар антери, эркек кетен кольмеги, явлукълар. Эльнен тикильген ве нагъышлангъан марамалар, эльнен токъулгъан юзьбезлер, ХIХ-ХХ а. эшьялары – демиркеле, гюгюм, ве ортасында къулланылгъан савут мефрушаты (этажерка), килим ве иляхре.
Севиль Абдурахманова малюматына коре, къырымтатар этнография музейи кой мектебининъ айры бир одасында 2003 сенеси ачылгъан эди. Сакъ районында бу 2-нджи му¬зей, биринджиси Сакъ шеэриндеки 6-нджы мектепте ерлешкен. Музейнинъ эсас тешеббюсчиси, ильхамджысы, тешкилятчысы, ерли сакини Шейде Асанова эди, онынъ ишинде онъа мектеп директоры, оджалар, ерли сакинлер иссе къоштылар. Къыскъа вакъыт ичинде о музей гъаесини омюрге кечире бильди. «Бизим несилимиз гъурбетликте догъса да, ана-бабаларымызнынъ Къырымгъа севгисини, Ватангьа асретлигини бизге ана сютюнен берабер синъди, - дей Шейде Асанова. - Биз бутюн омюр ватангъа къайтырмыз, деп бекледик. Ниает, биз озь топрагъымызгъа къайттыкъ. Башкъа миллет векиллеринен ян-янаша яшаймыз, ерлешемиз, балаларымыз ичюн омюр къурамыз. Бизим балаларымыз ана тилинде лаф этип оламагъаныны, озь тамырларыны, кечмишини, тарихыны бильмегенине, медениетимиз ве санатымызнен меракъланмагъанына чокъ эфкярланам. Узун сюргюнлик йыллары девамында бизим ана-бабаларымыз озь тилини, медениетини унутмадылар ве бу севгини бизге ашладылар. Энди бу севгини озь балаларымызгъа ве торунларымызгъа ашламакъ бизим невбетимиз кельди. Меним та яшлыкътан берли музейни ачмакъ арзум бар эди....
/Девамы - "Этнокультурные традиции крымских татар" джыйынтыкъта. Муэллиф - Лентара Халилова /