Кожная клубная ўстанова праводзіць святы.

Гэта прыцягвае не толькі гледачоў і ўдзельнікаў мастацкай самадзейнасці да культурна-масавых мерапрыемстваў, але і ўзбагачае кожнага духоўна.
У чарговы раз у Велікасельскім сельскім клубе звярнуліся да тэмы найважнейшага прадукту харчавання — хлеба. Загадчык установы культуры Аляксандр Бука змог згуртаваць мясцовых жанчын і стварыць фальклорны калектыў «Велікасельскія вячоркі». Яго ўдзельнікі, а ў асноўным гэта жанчыны, добра памятаюць тыя часы, калі іх продкі, дзядулі і бабулі, ладзілі народныя святы пасля выканання палявых работ. Адной з іх з’яўлялася заканчэнне жніва. У тэатралізаванай дзеі «Апошняя палоска» самадзейныя артысты прадэманстравалі, якімі прыладамі і як жалі жыта нашы продкі, як усхвалялі не толькі першы, але і апошні снапы. Жніўныя песні заўсёды гучалі над палеткамі, а ўвечары ўсе збіраліся, каб за святочным сталом аддаць даніну глыбокай павагі зямлі за шчодры ўраджай.
— Народныя традыцыі продкаў жывуць, дзякуючы той пошукавай дзейнасці, якую праводзяць работнікі культуры, — падкрэсліла старшыня Германавіцкага сельвыканкама Мая Якімовіч. — Гэта патрэбна не толькі нам, але і будучым пакаленням дзеля захавання багатай гістарычнай спадчыны.