Муҳаббат пойингга йиқилмайман , бас,

Бўлди , сенсиз яшаб ором оламан.
Менинг қалбим энди сеники эмас,
Мен ўзим ўзлигим ила қоламан.
Бўлди йиқилмайман пойингга сира,
Энтиктирган ҳисдан юрагим тўйди.
Бўлган эдим сенга тамом асира,
Қалбим кишанларинг синдириб қўйди .
Бўлди йиқилмайман асло пойингга,
Топталган меҳримни олиб суяман.
Сен ўйиб кемтиган кўнгил жойига,
Ундан малҳам қилиб боғлаб қўяман.
Тупроққа қоришган қадрим кўтариб,
Энди осмонларга олиб кетаман.
Тўлган сабр косам буткул тўнтариб,
Кўринмас оғудан халос этаман.
Бўлди!!!
Борлиғимни қайтардим ўзга,
Яшамайман ортиқ юрагим йўниб.
Бор энди кетавер бошқа бир кўзга,
Менинг кўзларимда боряпсан сўниб...