Куриськон.

Кин гожтэм тодмо ӧвӧл (оло Бӧдӟа гуртысь Саитдинов Гарифьян гожтэм, дыр).
Остэ, Бадӟым Инмаркае, тани.
Вапум вуон вакытъёсын шумпотыса мыныса, шумпотыса бертон берекетъёстэ сётыса улысалыд ке, мусо Кылчинэ, тани.
Тазалыкен-байлыкен сюрло вӧзы сюрло итӥськыса, кусо вӧзы кусо итӥськыса улон берекетъёстэ сётыса улысалыд ке, вапум вакытъёсын культо вӧзы культо пуктыса, чумолё пуктыса улымон берекетъёстэ сётыса улысалыд ке, ӟырдыт ӟеч Инмаре, тани.
Корто уробоосын, пар валъёсын чумолё возы чумолё пуктыса, корто уробоосын, пар валъёсын ньыкыр-някыр карыса ваён берекетъёстэ сётыса улысалыд ке, дас йыро кабан пуктыса улон берекетъёстэ сётыса улысалыд ке, мусо Кылчинэ, тани. Инкыре волдон вакытъёсам инкыр пачыл потыса улон берекетъёстэ сётыса улысалыд ке, мусо Кылчинэ, тани.
Сюреке поныку, валласянь поныку, улласянь пачыл потыса улон берекеттэ сётыса улысалыд ке, мусо Кылчинэ, тани. Шуныт-небыт зоръёстэ сётыса улысалыд ке, шуныт тӧло нуналъёстэ сётысалыд ке, тани. Шуныт толъёстэ тӧлатыса улысалыд ке, мусо Кылчинэ, тани.
Тазалыктэ-бурлыктэ сётыса улысалыд ке, мусо Кылчинэ, тани.
Тӥлям тӥлякме кабул карыса улысалыд ке, Бадӟым ӟеч Инмаре, тани.
Мынэсьтым вуттымтэосме ачид вуттыса улысалыд ке, югыт ӟеч Инмаре, тани. Тӥлям тӥлякме кабыл карыса улысалыд ке, мусо Кылчинкае, тани.
Шер киыным пазяммес ӵематыса сётысалыд ке, мусо Кылчинэ, тани. Сӥледлэсь-дауэдлэсь сакласа улысалэд ке, нымыредлэсь-кибиедлэсь сакласа улысалыд ке, нак казалэсь, нак балялэсь сакласа улысалыд ке, мусо Кылчинэ, тани. Тӥлам Тӥлакме кабул карыса улысалыд ке, лыктӥсьсэ пумит басьтыса, кошкисьсэ келяса улон берекетъёстэ сётыса улысалыд ке, югыт ӟеч Инмаре, тани. Кузьыли каръёс кадь каръёс улын байлыкъёстэ сётыса улысалыд ке, тулыс виясь вуос кадь тулкымъяськыса улон байлыкъёстэ сётыса улысалыд ке,мусо Кылчинэ, тани.
Шунды ӝужанысен, шунды пуксёнысен нимо-дано карыса улон берекетъёстэ сётыса улысалыд ке, мусо кылчинэ, тани.
Паськыт кыред кадь паськыт шудъёссэ сётыса улысалыд ке, мусо Кылчинэ, тани. Тӥлям тӥлякме кабул карыса улысалыд ке, Инмаре, тани. Омин!
Мар дыр тӥляса улӥськем, мар дыр малпамькем, малпамъёсм ымит карыса улысалыд ке, мусо Кылчинэ тани. Кыре поттэм кайванъёсмес кыр тыр карыса улон берекетъёстэ сётыса улысалыд ке, мусо Кылчинэ, тани. Гидэ пырон вакытазы ог пумзэ люкмесысен карыса улон берекетъёстэ сётыса улысалыд ке, югыт ӟеч Инмаре, тани. Тӥлям тазалыкме кабул карыса улысалыд ке, югыт ӟеч Инмаре, тани. Омин!
Нымыредлэсь-кибиедлэсь сакласа улысалыд ке, секыт зоръёслэсь сакласа улысалыд ке, мусо Кылчинэ, тани.
Тӥлям тӥлякме кабул карыса, шуныт кунулад басьтысалыд ке, бадӟым ӟеч Инмаркае, тани. Кунулгутырымон берекетъёстэ сётыса улысалыд ке, тӥлям тӥлякме кабул карыса улысалыд ке, Инмаркае, тани. Омин!
Оло берлозэ азьло вераськем, дыр, вератэк но кельтӥськем, дыр, югыт ӟеч Инмаре, тани. Мынэсьтым вуттымтэосме ачид вуттыса улысалыд ке, паськыт кыред кадь шудъёстэ сётыса улыслыд ке, байлыктэ сётыса улысалыд ке, мусо Кылчинэ, тани.
Тӥлям тӥлякме кабул карыса улысалыд ке, бадӟым ӟеч Инмаре, тани. Омин!