Выль нянь праздникен ӟечкыласько!

Выль нянь дыръя куриськон
Ӧстэ Козма Инмаре Кылчинэ, Вылӥысь Тӧдьы Буро Быдӟым Инмааре Кылчинэ армись лыктэм огпол Виль Нянь праздникез ортчытӥськом тани. Тонэ тодэ-бурэ вайыса, Тыныд рахмэт кылъёсын, шум потса котыр нянен, табанен куриськиськом, йыбыртӥськом Быдӟым Инмааре Кылчинэ тани. Азьпалан улонын шутдэ-бурдэ. Тазалыктэ, гымырдэ сётыса кылльысалыдке тани. Вордӥськем нуналэз шумпотса, рахмэт кылъёсын пумитаны, ӟечлыкен, быгатонлыкен, файдалыкен ортчытыны эрыктэ, визьдэ сётысалыд ке Быдӟым Инмааре Кылчинэ тани.
Вордэм нылпиослы шутдэ-бурдэ, тазалыктэ, кузь гымыыырдэ сётыса кылльысалыд ке тани. Кырыж сюрэслэсь, ултӥясь ужъёслэсь, амала муртъёслэсь утьыса вордыса кылльысалыд ке Быдӟым Инмааре Кылчинэ тани.
Тулыс кизем, палькем ю-няньёсыз тыр карыса ыдалтыса кылльысалыд ке, камыж куроё, бортдор кадь, сёр но потонтэм тыгыз, узы-боры кадь кисьматыса кылльысалыд ке Быдӟым Инмааре Кылчинэ тани. Октон калтон дыря шундыё чебер нуналъёстэ, куазьёстэ сётысалыд ке Быдӟым Инмааре Кылчинэ тани. Октем ю-нянез кенос трос луыса. Виль кеносъёс пуктоно мед луысал Быдӟым Инмааре Кылчинэ тани.
Турым октон-дасян дыръя чебер ӟэмны куазьёстэ сетыса кылльысалыдке. Кужымдэ,быгатонлыктэ сётысалыдке Быдӟым Инмааре Кылчинэ тани. Дасям турыммы толбытлы мед огмоз Быдӟым Инмааре Кылчинэ тани.
Ыжез-кечез гоно-туро карысалыд ке, скалъёсмэс йӧло-вӧё карысалыд ке. Вузанозэ вузаны, вордонозэ-вордыны мед быгатысалмы Быдӟым Инмааре Кылчинэ тани.
Чыштэм вӧй кадь зоръёстэ, лимыт тӧлъёстэ сётысалыд ке Быдӟым Инмааре Кылчинэ тани. Тылпулэсь, ӟӧ зоръёслэсь , сильтӧллэсь утьыса вордысалыд ке Быдӟым Инмааре Кылчинэ тани. Делеттэ, берекеттэ сётыса кылльысалыд ке Быдӟым Инмааре Кылчинэ тани. Пал кимы муын пал кимы вӧйын мед кыллёз Быдӟым Инмааре Кылчинэ тани. ОМИН! ОМИН! ОМИН!