თურქულმა სერიალმა „სიყვარული და სასჯელი” ქართველ ტელემაყურებელთა დიდი სიყვარული უკვე მოიპოვა – სერიალმა არაერთი თაობის „საპნის ოპერის” მოყვარულთა გულები დაიპყრო და მათი განსჯის საგნად იქცა.

სერიალის გმირების ცხოვრება აქტიურად განიხილება ტრანსპორტში, სამზარეულოსა და სოციალურ ქსელში. საზოგადოებრივი ინტერესის გათვალისწინებით, საინტერესო იქნება, გავეცნოთ გახმაურებული სერიალის თურქი ვარსკვლავების ბიოგრაფიებს.
ნურგულ იეშელჩაი – იასემინი
ერთ-ერთი ყველაზე ცნობილი და მოთხოვნადი თურქი მსახიობი ქალი, ნურგულ იეშელჩაი 1976 წლის 25 მარტს დაიბადა ქალაქ აფიონში, თურქეთის დასავლეთში. ის იზმირში იზრდებოდა, სადაც მამის დახმარებით, ოთხი წლის ასაკში ისწავლა წერა-კითხვა. ბავშვობაში ნურგული, მურატ ილდირიმის მსგავსად, მათემატიკით იყო გატაცებული. სამსახიობო განათლება ნურგულიმ ანტალიაში, სასცენო ხელოვნების ინსტიტუტში მიიღო. მოგვიანებით, მან ესკიშეხირის უნივერსიტეტში სასცენო სკოლის კურსებიც გაიარა. პირველი როლი კინოში ნურგულ იეშელჩაიმ 1998 წელს ითამაშა ფილმში „ყველაფერი კარგად იქნება”, რომლის ეკრანებზე გამოსვლის შემდეგ, ის თურქმა მაყურებელმა შეიყვარა. 2004 წელს ნურგულ იეშელჩაი ცოლად გაჰყვა მსახიობ ჯემა ეზერს, თუმცა ისინი მალევე განქორწინდნენ. ნურგულს ჰყავს 2005 წელს დაბადებული ვაჟი, სახელად ოსმანი. ნურგულ იეშელჩაი არც გულახდილ თემებზე საუბარს ერიდება ინტერვიუებში. მაგალითად, ცნობილია, რომ ნურგულის მეორე სიყვარული ტუბერკულოზით იყო დაავადებული და მასთან განშორება ნურგულს მშობლებმა აიძულეს. მსახიობის თქმით, ის აღარ ფიქრობს ქორწინებაზე და თავს ბედნიერად გრძნობს საყვარელ ადამიანთან ყოველგვარი ფორმალობის გარეშე.